قاراداغ ( قاراداغا قار یاغدی)

شاعیر: امین حبیبی اهر

دئمه دیم قیش گه له جک قاباغدا ایش وار قاراداغ ؟
بودا قیش گلدی بویور یاغدی باشا قار قاراداغ .

نه چوخیمیش سنه یولداش هئچ اؤزون بیلمیردین !
ده گؤرک کیم قالیب آخیردا سنه یار قاراداغ ؟

بیری واردیر دئدی ال وورمارام اؤلسم سازا من !
قارا گیمیشدی سنین خاطیریوه تار قاراداغ !

باشین اوستونده کی قارتال لاریوا یئر یوخیدی !
او قدر آلمیشیدی اطرافیوی سار قاراداغ !

ایندی قارتال لاریوین ائو ائشیگی قاردا قالیب
قانا دؤنموش اورگی گؤزلری آغلار قاراداغ

نئچه باغبان تاپیلیب کردیلرو بئل له دیلر
یایدا کی باغچا وئریب قیشدا عجب بار قاراداغ !

سئرچه لر چؤلده یاتیبسا چمنین وارلیغی یوخ
گؤرمورم منکی بو توصیفیله گولزار قاراداغ

هر خوش الحان قوشا بولبول دئماق اولمور نئینیم
قولاغا چاتسادا آوازیله قارقار قاراداغ

سنده من تک ائله بیل بی وفالاردان یانیسان
اولمادی دردیوه بیر صیدقلی غمخوار قاراداغ

بیز اونو گؤزله مه ده دردیله یالقیز یالقیز
او تاپیبدیر اؤزونه بیر نئچه دیلدار قاراداغ

بیزده ایمکان اولا بو بی وفالاردان قاچاروخ
آما عشقین ایپیدیر بوینوموزا دار قاراداغ

امینم سؤز یازیرام تر آخیر آلنیم نان اینان
سؤز یاراندیغجا گلیر سؤزجوگومه آر قاراداغ !

منبع: http://aminhabibi.blogfa.com/post-322.aspx